Како што објави министерот за здравство на Грција, Василис Кикилас на неодамнешната прес -конференција, новите мерки ќе важат во Грција од почетокот на септември.
На лицата кои немаат валиден доказ за вакцинација или релевантни докази дека се заразиле со коронавирус, нема да им биде дозволено да влезат во затворени места за забава, ресторани и кафулиња, на прво место.
Новите мерки, исто така, предвидуваат дека невакцинираните лица, кои се вработени во јавниот и приватниот сектор, имаат обврска да прават тест еднаш неделно, почнувајќи од 13 септември. Цената на тестот е 10 евра.
Мерката суспензија на работа за сите здравствени работници кои не се вакцинирани ќе се почитува без никакво одлагање, објави министерот за здравство на прес -конференција, пренесува Newpost.gr. Тој, исто така, напомена дека задолжителната вакцинација важи и за приватни лекари и за фармацевти во примарната здравствена заштита.
Обврската на невакцинираните наставници и професори, како и оние кои работат во туризмот, угостителството, телевизијата, филмот, театарот, музиката и танцовата продукција, се два теста на неделно ниво. Тие се должни да ги наведат резултатите на платформата предвидена за тоа.
Од студентите ќе се бара да прават два теста неделно и тие ќе бидат бесплатни.
Сите туристи кои не се вакцинирани, а се постари од 12 години, имаат обврска да поднесат негативен брз тест, не постар од 48 часа. За деца постари од пет години, воведена е обврската за само-тестирање.
Се уште е задолжително да ја носите маската во затворени простории, но и на отворено, доколку има собир.
Според последните податоци, вкупно 5.635.437 лица биле вакцинирани со двете дози на вакцини во Грција, додека 5.917.139 граѓани примиле барем една доза од вакцината.
– Наша обврска е, колку што е можно, да обезбедиме брзо враќање во нормалниот живот – изјави портпаролот на Владата на Грција, Јоанис Иконому.
– Општеството не може да чека и да остане заложник на перцепцијата на оние кои одлучиле да не се вакцинираат. Нема да дозволиме никој да се меша со личност која сака да работи, создава, заработува за живот, млади луѓе кои сакаат да се образуваат и забавуваат, пациенти кои страдаат од коронавирус – истакна тој на брифингот.