Високиот комесар на ОН за човекови права Мишел Бешел побара од Белорусија денес да спроведе истрага за наводите за тортура од страна на припадници на безбедносните сили против демонстрантите, а Советот за човекови права на ОН закажа итна седница за состојбата во Белорусија во петок, на барање на Европската унија.
„Со оглед на обемот и бројот, сите обвинувања за тортура и друго лошо постапување од страна на безбедносните сили треба да бидат документирани и истражени за сторителите да бидат изведени пред лицето на правдата“, рече Високиот комесар на отворањето на 45-та седница на Советот за човекови права на ОН во Женева.
Одлуката за организирање итна дебата на Советот за човекови права на ОН беше донесена по гласањето. Вкупно 25 земји гласаа „за“, две земји беа против, а 20 беа воздржани.
Од 9 август во Белорусија траат масовни протести, поради спорните претседателски избори на кои беше реизбран Александар Лукашенко. Голем број луѓе беа уапсени на демонстрациите во Минск и низ целата земја, а апсењата се придружени со обвинувања за бројни случаи на тортура.