Либанскиот Хезболах соопшти дека извршил симултани напади врз израелските позиции на либанската граница во саботата, додека жителите на јужен Либан пријавиле некои од најтешките израелски напади досега во прекуграничните судири од 8 октомври.
Израелската војска соопшти дека нејзините воени авиони погодиле цели на Хезболах како одговор на претходниот напад од либанска територија и дека тие ги следеле воздушните напади со артилериско и тенковско гранатирање.
Либански извор запознаен со нападите на Хезболах рече дека групата истрелала моќна ракета која сè уште не била искористена во борбите, велејќи дека погодила израелска позиција преку границата од селата Ајта ал Шааб и Рмајч.
Хезболах разменува оган со израелските сили преку либанско-израелската граница откако неговиот палестински сојузник Хамас влезе во војна со Израел на 7 октомври.
Тоа се најлошите борби на границата од војната во 2006 година, но најмногу беа задржани во пограничната област.
Водачот на Хезболах, Саид Хасан Насрала, во својот прв говор од почетокот на војната меѓу Хамас и Израел, во петокот рече дека ескалацијата на либанскиот фронт ќе зависи од настаните во Газа и израелските дејствија кон Либан. Тој исто така рече дека нападите на границата досега „нема да бидат сè“ што ќе направи Хезболах.
Речиси 60 борци на Хезболах загинаа во размената на оган.
Безбедносни извори и сведоци во Либан објавија за некои од најтешките израелски напади до сега.
Два густи столба чад се забележани како се издигнуваат над ридот во близина на либанскиот град Кијам на снимката споделена за „Ројтерс“ од жителот на Кијам, Сохеил Салами, кој навел дека областа била погодена од израелски воздушен напад.
„Денешното гранатирање е многу зголемено – гранатирање од отпорот и контра гранатирање од страна на Израелците“, изјавил Фуад Креис, исто така, зборувајќи за „Ројтерс“ од Хијам. „Четири гранати паднаа на периферијата на Хијам, без повредени“, рече тој.
Израелската војска соопшти дека меѓу погодените цели имало „терористичка инфраструктура, складишта за ракети и складишта кои ги користи Хезболах“.
Израел соопшти дека нема интерес од конфликт на северната граница. Израелскиот премиер Бенјамин Нетанјаху минатиот месец го предупреди Хезболах да не отвара втор воен фронт, велејќи дека тоа ќе донесе израелски контра удари од „незамислива“ големина што ќе предизвика „уништување“ на Либан.