Премиерот на ЦрнаГора, Здравко Кривокапиќ денес рече дека верува оти резолуцијата за Сребреница, усвоена во црногорскиот парламент, како што наведува, „беше навистина непотребна“, бидејќи ги продлабочува поделбите и конфликтите во општеството, а ја нема ниту БиХ.
„Црна Гора веќе ја усвои декларацијата на Европскиот парламент за настаните во Сребреница“, напиша Кривокапиќ на својот профил на Твитер.
Кривокапиќ вели дека Црна Гора се борела и ќе се бори за демократија и слобода.
„Извршната власт е целосно одделена од законодавната власт и секој во парламентот има еднакво право на слободен глас. Одлуката ја донесе Собранието и јас, како премиер, ниту го иницирав ниту го поддржав усвојувањето на оваа резолуција“, рече премиерот.
Кога станува збор за настаните во Јасеновац, Сребреница, Братунац и каде било на друго место каде што „има невини жртви, во повеќе наврати реков дека не можеме да ги политизираме жртвите и да ги користиме за да собереме ефтини политички поени“.
„Покажувам еднаква почит кон сите жртви. Поединци стојат зад злосторството, никогаш нации, и ниту една нација не може да биде геноциден, заради постапките на поединци од таа нација“, рече Кривокапиќ, додавајќи: „Простуваме, не забораваме на солзите на соседите, но мора да гледаме кон иднината. Не можеме да го смениме минатото, но можеме да влијаеме на сегашноста и подобрата иднина на нашите деца“.