Холивудската двојка Ештон Качер и Мила Кунис собраа повеќе од 15,9 милиони долари до недела, откако отворија страница на GoFundMe со барање за хуманитарна помош за украинските бегалци.
Кунис, којa е роденa во Черновци, Украина во 1983 година, се пресели во САД во 1991 година.
„Отсекогаш се сметав себеси за Американка, горда Американка… Но денес никогаш не сум била погорда што сум Украинка“, рече Кунис во придружното видео. „Настаните во Украина се катастрофални. Нема место на овој свет за ваков неправеден напад врз човештвото“.
Качер, кој седеше до Кунис на видеото, рече дека средствата ќе бидат искористени за обезбедување хуманитарна помош за Украинците погодени од руската инвазија.
„Главниот предизвик е логистиката. Треба да добиеме станови и треба да донесеме резерви и ресурси во областа“, рече Качер. „И никогаш не сум бил погорд што сум во брак со Украинка“.
Двајцата актери, кои се венчаа во 2015 година, се договорија сами да донираат 3 милиони долари, со крајна цел да соберат 30 милиони долари.