Научници успеаја да докажат дека климатските промени играат голема улога во ширењето на западнонилскиот вирус во Европа, за кој се сомневаше извесно време, објави денеска белгиската новинска агенција „Белга“.
Досега климатските промени се сметаа за една од можните причини за ширење на вирусот, заедно со уништувањето на шумите и зголемената густина на населението, а сега тоа го потврдија и истражувачи од два бриселски универзитети.
Како маларијата, западнонилскиот вирус се пренесува преку комарци. Околу четвртина од заразените добиваат симптоми, вклучувајќи треска и главоболка, а помалку од еден процент развиваат тешки невролошки компликации.
Тој вирус предизвикува болест наречена западнонилска треска, која првично се појави во области поблиску до Екваторот, но климатските промени придонесоа за проширување на заразените живеалишта на комарци.
Водечката авторка на студијата, Дијана Еразо, рече дека резултатите од нивното истражување покажуваат дека климатските промени „играат важна улога во ширењето на западнонилскиот вирус во Југоисточна Европа“.
Коавторот на студијата Вим Тиџери рече дека „можеме да го видиме фокусот на Балканот и Медитеранот“ и додаде дека „миграцијата на комарците на север ќе се шири и во Скандинавија се додека траат климатските промени“.
„Покрај ескалацијата на климатските екстреми, појавата на тропски болести во Европа е, за жал, една од многуте логични последици на нашата зависност од нафта, јаглен и гас“, рече Тиери.