Папата Франциск рече дека конфликтот меѓу Израел и Палестина бара решение кое ги вклучува двете држави, нагласувајќи дека „војната е секогаш пораз“.
„Тоа се луѓе кои мора да живеат заедно. Со мудра одлука како две држави, според договорот од Осло, две добро дефинирани држави и посебен статус за Ерусалим“, изјави синоќа папата за италијанската телевизија РАИ.
Тој изрази надеж дека ќе се избегне ширењето на конфликтот во регионот и додаде дека е загрижен поради порастот на антисемитизмот, пренесува „Ројтерс“.
Во 1993 година, израелскиот премиер Јицак Рабин и водачот на Палестинската ослободителна организација Јасер Арафат постигнаа договор за Договорот од Осло, со кој беше воспоставена ограничена палестинска автономија.
Американскиот претседател Бил Клинтон, израелскиот премиер Ехуд Барак и Арафат не успеаја да постигнат конечен мировен договор на самитот во 2000 година.
Израел го зазеде Источен Ерусалим во 1967 година, а во 1980 година го прогласи целиот град за „уникатна и вечна престолнина“.
Палестинците го сметаат источниот дел на Ерусалим за свој главен град.
Израел постојано ги отфрла сугестиите дека Ерусалим може да има посебен или меѓународен статус.