Претседателот Стево Пендаровски, во Приштина изјави дека Скопје го поддржува дијалогот меѓу Србија и Косово со цел да се најде заемно прифатливо решение кое ќе придонесе за стабилноста во регионот и нема да ја загрози безбедноста на соседните земји.
По разговорот со косовската претседателка Вјоса Османи, Пендаровски рече дека дијалогот Белград-Приштина е една од темите.
„Сите сме свесни дека ова е многу тежок и комплициран процес, но верувам дека сите луѓе со добра волја во регионот и пошироко ќе го поддржат решавањето на спорот, што на крајот ќе значи неповратно смирување на регионот“, додаде тој.
Пендаровски потсети дека „Северна Македонија поддржува заемно прифатливо решение во дијалогот меѓу Белград и Приштина, со потенцијал да придонесе за регионалната стабилност и кое нема да ја загрози безбедноста на соседните земји“, додавајќи дека Скопје го поздравува договорот за деескалација на тензии во северно Косово, постигнат со посредство на Европската Унија.