Очигледно е дека во македонските болници лекувањето има многу слаб квалитет. Нашите здравствени власти имаа време од 18 месеци да доведат неколку странски доктори кои би лекувале едно одделение болни од ковид, каде нашиот медицински персонал би научил како треба правилно да се лекува, смета професорот Дејан Трајковски кој редовна ја анализира ковид-статистиката на заразени и починати од коронавирус во земјава.
Според него, во вакви ситуации треба суетата да се остави на страна, бидејќи чини многу човечки животи.
-Всушност, бидејќи се работи за нова болест, самите доктори требале да побараат странска помош, затоа што леталитет од 61,5% е сé, само не нормален. За споредба, во САД стапката на болнички леталитет од ковид изнесува околу 10%.
Иако се изгубени многу животи (одвишната смртност од почетокот на епидемијата до сега изнесува околу 13.000 лица), не е доцна да се проба со странски доктори, бидејќи есенскиот бран штотуку започнува. Во западна Европа повеќе нема голем притисок врз болниците, па ќе биде полесно да се најдат слободни доктори. А со суетата можеме да продолжиме после епидемијата, пишува меѓу другото професорот на својот Фејсбук профил.