ИЗГЛЕДА дека авантурата на Fisker во автомобилската индустрија ќе заврши лошо, пренесува „ХАК“.
Брендот основан од Хенрик Фискер минува низ многу тешки времиња, до тој степен што веќе ги предупредил своите вработени дека може на краток рок да ги отпушти доколку не најдат дополнителни средства. И оваа потрага по финансирање очигледно се спушта на лично ниво, бидејќи основачот и најголемиот акционер на компанијата ја стави својата раскошна куќа на продажба.
Инаку, ова не е првпат компанијата на Фискер да пропадне. Слично нешто се случи и пред десет години, но тогаш тој направи прилично успешен кам-бек. Се зборуваше за тоа пред неколку години како можен конкурент на Tesla. Но, тоа никогаш не се оствари.
Хенрик Фискер продава ултрамодерна куќа во Лос Анџелес за 35 милиони долари. Исклучително висока сума што одговара не само на големината и луксузот на куќата, туку и на нејзината привилегирана локација: во Холивуд Хилс, една од најексклузивните области на Лос Анџелес.
Куќата на Фискер е навистина неверојатна. Таа има 1096 квадратни метри (на вкупно 1740 квадрати земјиште), 6 спални соби и 8 бањи.
Сместена е на рид, па има привилегиран поглед на градот од неколку соби на куќата, вклучувајќи неколку спални соби и секако од базенот на импресивната тераса. Ги има сите удобности што секој може да ги посака: спа, сауна, теретана, спектакуларна тераса…
Гаражата не е преголема во споредба со остатокот од вилата и може да смести шест автомобили распоредени на два ката благодарение на хидрауличниот лифт.
Не е познато зошто Хенрик Фискер ја ставил својата луксузна куќа на продажба, но вистината е дека неговата компанија моментално е на пресвртна точка и на почетокот на овој месец производителот објави дека наскоро ќе мора да поднесе барање за стечај доколку не добие финансиска инјекција.
Интересно е тоа што куќата вреди повеќе од пазарната капитализација на Fisker: компанијата моментално се проценува на 26 милиони долари.
Хенрик Фискер и неговата сопруга Геета Гупта-Фискер го купиле овој имот во 2021 година за 21,8 милиони долари. Доколку има некој заинтересиран, куќата се издава и за „скромни“ 116.000 евра месечно.