Реките во Словенија, во подрачјата погодени од недамнешните поплави, ќе останат речиси без риби, соопшти денеска Словенечкото риболовно здружение.
Поголемиот дел од рибите угинале од силните струи и од матната вода, пренесува „СТА“.
Многумина што успеале да преживеат завршиле на полињата, додека некои од нив биле спасени од рибари кога водата се повлекла.
Рибите ќе бидат повторно населени каде што тоа е можно, така што некои што се одгледуваат на вештачки начин, како што е пастрмката, ќе бидат преместени од рибниците во реките, додека видовите кои не се одгледуваат вештачки ќе мора да се населат природно, што ќе трае најмалку три години.
„Многу млади риби угинаа бидејќи не можеле да се повлечат“, изјави претседателот на Словенечкото риболовно здружение Мирослав Жаберл.
Реките беа контаминирани со отпадни води и нафта од резервоарите.
„Сето ова не е добро ниту за потоците, ниту за рибите“, рече Жаберл.
Засега не е јасно дали рибата која е зафатена од поплавите ќе биде безбедна за консумирање.
„Не можат да се проценат штетите што ќе ги имаат нашите рибари поради празните реки и потоци“, додаде Жаберл и додаде дека состојбата по поплавите ќе влијае и на риболовниот туризам.