Македонија ги започна подготовките за промени во Уставот, со кои Бугарите ќе станат дел од него. Министерот за надворешни работи Бујар Османи му одговори на бугарскиот колега Николај Милков дека за Бугарија нема место во овој процес, бидејќи уставот е внатрешно прашање.
Министерството за правда упати дописи со барање за номинација на членови и експерти, кои можат да се пријават и да бидат дел од работната група, која треба да ги утврди амандманите за промена на Уставот. Рокот што им го дале за да предложат експерти е до 10 април 2023 година.
Според претседателот Стево Пендаровски, целиот процес треба да заврши пред летото. На ова вчера повика и хрватскиот премиер, кој беше во посета на земјава.
Барањето за вклучување на Бугарија во уставните измени во Република Северна Македонија не е пристигнато, ниту пак било разговарано меѓу Бујар Османи и Николај Милков, соопшти вчера нашето Министерство за надворешни работи.
-Се очекува Парламентот да донесе одлука за уставните измени, суверено и во согласност со долгорочните интереси на граѓаните на Северна Македонија и во овој контекст не постои можност или политичка волја да се вклучат граѓани и институции од во странство, вклучително и од Република Бугарија. Вакво барање ниту е пристигнато, ниту разговарано меѓу министрите Османи и Милков, се вели во пораката од МНР.
-Северна Македонија останува посветена на продолжување на политичкиот дијалог со Бугарија, во духот на добрососедството и Договорот за пријателство, добрососедство и соработка, за што се надеваме дека новата бугарска влада ќе биде формирана што е можно поскоро, се додава во соопштението.
Во Брисел, бугарскиот МНР Николај Милков изјавил: „Колку што знаеме, се разговара за опции за идните текстови, кои би биле промена на уставот (на Република Северна Македонија). Ние би сакале да бидеме дел од овој процес, за да може да помине без проблеми. Би сакале да се консултираме со нив за овие прашања. Во оваа смисла, вчера накратко разговарав со министерот Бујар Османи, се надевам дека ќе одговорат“.