По терористичкиот напад во киевската област Холосиевскиј, во кој загинаа шест лица, украинскиот министер за внатрешни работи, Игор Клименко го опиша однесувањето на полицајците кои избегале од местото на настанот како срамно.
„Вчерашната трагедија во Киев со право покрена голем број контроверзни прашања. Би сакал да коментирам за некои од нив. Постапките на полицаецот и полицајката кои пристигнаа на местото на терористичкиот напад се срамни. Ова е срам за целиот систем. Тие се суспендирани и истрагата е во тек. Ќе бидат донесени и дополнителни кадровски одлуки во врска со нивните претпоставени“, порача Клименко.
Сепак, Клименко верува дека не е сосема соодветно да се генерализира за целата полициска сила врз основа на постапките на двајца полицајци.
„Изолираните ситуации не го одразуваат системот како целина. На крајот на краиштата, дури и во истата оваа специјална операција, единицата KORD на Националната полиција, криминалистичките аналитичари и другите распоредени сили дејствуваа професионално и брзо“, истакна тој.
Тој, исто така, кажа дека менталната состојба на напаѓачот била очигледно нестабилна.
„Неопходно е да се испита како ги добил потребните медицински сертификати за обновување на дозволата за оружје. Ова ќе се направи за време на истрагата“, нагласи тој.
Тој, исто така, вети дека нема да има масовни проверки на сопствениците на оружје.
Во врска со прашањето за давање право на цивилите да поседуваат огнено оружје, вклучително и пиштоли, министерот за внатрешни работи вели:
„Верувам дека на луѓето мора да им се даде право на вооружена самоодбрана. Особено по искуствата од првите денови од големата инвазија, кога на цивилите им беше дадено оружје за национален отпор.“
Министеро вети дека во блиска иднина ќе одржи експертски дискусии со учество на членови на парламентот, јавноста, новинари и заедницата на ветерани за подготовка на конечната верзија на законот за цивилно оружје.
Истражителите го третираат убиството на цивил во Киев како терористички напад што резултираше со смртни случаи.