Унгарскиот министер за надворешни работи Петер Сијарто денеска најави дека Унгарија нема намера да разговара за забрана на увоз на природен гас од Русија со други земји од ЕУ, бидејќи тоа ќе ја уништи унгарската економија, пренесе агенцијата Тас С.
На состанокот на Европскиот совет за транспорт, телекомуникации и енергија во Луксембург, Сијарто рече дека дошол со „јасен мандат“ и дека Унгарија нема да разговара за ембаргото за гас.
„Не гледаме проблем во Европската унија да бара нови извори на гас, но учеството во него може да биде само доброволно и ниту една земја-членка не треба да има никаква обврска во врска со купувањето“, рече Сијарто.
Тој додаде дека Унгарија очекува Европската комисија да каже дали е точно дека приливот на гас од Русија во Европа преку Северниот тек е намален бидејќи опремата испратена во Канада за одржување не е вратена.
„Доколку тоа е вистина, очекуваме чекорите на Европската комисија да се осигураат дека снабдувањето со гас на Европа не е во краткорочна криза“, порача Сијарто.
Руски Газпром на 14 јуни објави дека е намалено снабдувањето со гас бидејќи некои пумпни единици испратени до германската компанија Сименс не се вратени во догледно време. Сименс изјави дека не може да ги врати единиците кои се во Канада, бидејќи земјата воведе санкции кон Русија.