Албанскиот премиер Еди Рама е убеден дека Србија ќе има свој претставник на претстојниот самит ЕУ-Западен Балкан што се одржува во Тирана. По најавата на српскиот претседател дека нема да присуствува, а потоа „дека ќе размисли“, албанскиот премиер, како што пренесува „Газета експрес“, тврди дека Вучиќ „нема друг избор освен да дојде“.
Вчера, како што пренесуваат приштинските медиуми, Рама изјавил дека „Србија ќе биде на самитот“, во спротивно „би било катастрофа“ за Вучиќ.
-Се надевам дека Србија ќе биде присутна во Тирана и ќе ги изнесе своите ставови. Би рекол дека за момент дојде до недоразбирање во односот ЕУ-Србија, вели за „Локално“ независниот новинар и политички аналитичар Милутин Миша Илиќ околу можноста претседателот на Србија, Александар Вучиќ да не учествува на Самитот што на 6-ти декември ќе се одржи во Тирана.
Илиќ добива „впечаток дека Србија е турната до ѕид и нема каде да се оди, што предизвика бурни реакции“.
-Мислам дека Србија и регионот имаат јасна перспектива во ЕУ. Има многу простор за дипломатија во однос на истовремениот влез на Србија и Косово во ЕУ, на кој било начин да го договорат решението. Би било полесно доколку Србија заземе јасен став за заедничката надворешна политика на ЕУ плус Западен Балкан што се однесува до санкциите против Русија. Самоизолацијата и бојкотот од кој било актер би биле во спротивност со прокламираните начела на ЕУ, оценува аналитичарот.
Илиќ е дециден дека Србија го смета Косово и Метохија за своја покраина.
-Се однесува на истиот принцип на територијален интегритет што Западот сака да го примени во случајот со Украина, но реченицата: Крим и Донбас се Украина, а Косово и Метохија е Србија не е во речникот на водечките политичари во Белград. Тактиката на Белград е Србите да се појават обединети на изборите на Косово и Метохија за подобро да ги претстават своите потреби, бидејќи во секој исход тие секако се малцинство на Косово и Метохија. Српската листа ја претставува изборната волја на Србите во таков формат. Назначувањето на Ненад Рашиќ во Владата на Косово, српскиот претседател го доживува како потценување и манипулација со изборната волја на косовските Срби, објаснува соговорникот.
Аналитичарот информира дека Рашиќ бил избран од редовите на косовските Срби за пратеник во Парламентот на Косово во 2014-2017 година, а во извршната власт беше министер за труд и социјална политика во 2008-2014 година. Според мислењето на меѓународните претставници, тој припаѓа на политичари со исклучително умерени ставови.
-Еден период тоа беше дел од тактиката на обединет настап на Србите на Косово и Метохија заедно со Српски листа, сега не е. Настапува во тесна соработка со Рада Трајковиќ, а останаа без доверба од гласачите, што според мене е причина за оспорување на Белград, порачува Илиќ.
Курти ги прави истите грешки како и С. Милошевиќ, смета соговорникот. Според Илиќ, косовскиот премиер е скриен марксист-ленинист по вокација и за него демократијата е нужно зло.
-Тој не ја прифаќа волјата на избраните Срби поради политиката што ја претставуваат во Парламентот на Косово. Ги кани во Владата српските претставници што ги сака. Прашање е дали тоа е во согласност со Уставот на Косово. Ако е така, тој Устав не е демократски, не ги почитува правата на малцинствата и треба да се промени по итна постапка. Да се потсетиме на грешките и правната рамнотежа на Милошевиќ, истакна српскиот новинар и аналитичар.
Ивица Дачиќ
Српскиот министер за надворешни работи Ивица Дачиќ вчера изјави дека српскиот претседател Вучиќ ќе одлучи за заминување во Тирана по денешната средба со специјалниот пратеник на ЕУ за дијалог меѓу Белград и Приштина и други регионални прашања, Мирослав Лајчак.
Дачиќ рече дека одлуката за учество на претседателот на Самитот на Европската Унија и Западен Балкан не е мотивирана од тоа дали Србија сака да влезе во ЕУ, туку од „бескрајната толеранција на ЕУ кон оние кои испровоцираа ескалација на конфликтот во Косово, односно кон Курти“.
Лајчак доаѓа во Белград во екот на заладувањето на односите меѓу Белград и Приштина поради назначувањето на Ненад Рашиќ за министер во Владата на Косово и спорот околу регистарските таблички.
Н.П.