Претседателот на САД, Доналд Трамп го именува Џон Хантсман за амбасадор во Русија.
Републиканецот Хантсман (57) е поранешен гувернер на Јута, а од 2009 до 2011 година, за време на мандатот на Барак Обама беше амбасадор во Кина.
Тој во 1992 година, на 32-годишна возраст беше амбасадор на САД во Сингапур, со што стана најмладиот дипломат во последните сто години.
Хантсман соработувал со администрацијата на пет американски претседатели, а во 2012 година беше кандидат за претседателска номинација на републиканците.
– Гувернерот Џон Хантсман имаше забележителна кариера како политичар, дипломат и бизнисмен. Тој во моментот е претседател на Атлантскиот совет на САД и на Фондацијата Хантсман за борба против ракот, се наведува во соопштението од Белата куќа.
Тој беше и член на управни одбори на големи компании како „Хилтон“, „Шеврон“, „Форд мотор“ и „Катрпилар“.
Хантсман е женет и е татко на седум деца.