Џорџ Клуни сака да се сретне со канцеларката Ангела Меркел и мигранти во Германија. Клуни зборуваше пред новинарите на отворањето на филмскиот фестивал во Берлин.
“Берлинале”то, кој ќе трае 11 дена и е еден од трите најпрестижни европски фестивала, започна со проекција на “Hail, Caesar!”, во режија на браќата Коен и со Клуни во главната улога. Клуни пристигна за отворањето заедно со својата жена Амал, која е родена во Либан и е познат бранител на човековите права.
Актерот изрази желба утре да се сретне со Меркел, а одделно од тоа и со група бегалци “за да разговараме и прашаме што можеме да направиме за да помогнеме”.
Берлинскиот фестивал содржи во својата програма неколку филмови за миграцискиот бран кон Европа, но според Клуни на американската киномека Холивуд ќе ѝ треба време за да го насочи вниманието кон такви приказни.
“Лошото нешто во филмската заедница е што повеќе реагираме на ситуациите, отколку да ја преземеме водечката улога. Вестите треба да продолжат да доаѓаат, а потоа се пишуваат сценарија и се потребни неколку години пред да има филмови за овие приказни. За тематски филм исто така е потребен повод – посебен лик или причина “, изјави Клуни.
Со оглед на фактот дека во Германија и цела Европа минатата година пристигнаа 1,1 милиони мигранти, темата е сериозно засегната во рамките на филмскиот фестивал. Стотици бесплатни билети ќе бидат дадени на азиланти, а посетителите ќе имаат можност да учествуваат во бројни добротворни иницијативи.
Италијанскиот документарен филм на Џанфранко Роси ќе учествува во основното трка со “Fire at Sea” ( “Пожар во морето”) – филм за медитеранскиот остров Лампедуза, кој пречекал голем број мигранти.
“Златната мечка”, главната награда на фестивалот, ќе биде врачена на 20 февруари. Жирито оваа година е предводено од трикратната носителка на “Оскар” Мерил Стрип, а во него уште е и британскиот нејзин колега-актер Клајв Овен.
Според Овен, целта на жирито е да награди некој чија кариера ќе има корист од наградата и таа ќе му даде можност да прави други важни филмови. Минатата година наградата отиде кај иранскиот дисидент Џафар Панахи за неговиот филм “Такси”, направен тајно од властите во Техеран.