Франција нема да ја признае Каталонија доколку тој шпански регион еднострано прогласи независност, изјави денеска францускиот министер за европски прашања, Натали Луазо.
„Доколку биде прогласена независност, тоа ќе биде еднострано и нема да биде признато“, рече таа за една локална телевизија.
Луазо додаде и дека „Каталонија не може да биде дефинирана со гласањето кое го организира движењето за независност пред нешто повеќе од седум дена“ и дека “кризата треба да се решава низ дијалог и на сите нивоа на шпанската политика“.
Таа смета дека би било избрзано признавање на независноста по едностраното прогласување и ќе претставува отфрлање на одговорностите кои ги има Франција.
Додаде дека ако Каталонија биде призната, таа автоматски ќе ја напушти Европската унија.