Србија се обидува во нашиот регион да го направи она што Русија го прави во нејзиниот, изјави денеска претседателот на Црна Гора, Мило Ѓукановиќ, кој беше гостин на американскиот Институт за мир.
Руската агресија врз Украина има многу силни рефлексии на подрачјето на Западен Балкан, а нејзиното најдрастично влијание на Балканот, според Ѓукановиќ, се случило во Црна Гора за време на парламентарните избори во 2016 година, пишува порталот ЦДМ.
Тој изјави дека Русија тогаш се обидела со државен удар да ја смени владата во Црна Гора и да го запре приемот на Црна Гора во НАТО, но земјата успеала да се спротивстави.
Во Западен Балкан, смета Ѓукановиќ, имаме очигледна реплика на она што Русија сака да го направи во својот регион.
На Балканот имаме обид да се создаде „српски свет“, по моделот на „рускиот свет“. Русија се обидува да ја ревидира историјата на земјите од својот регион за да ја постигне доминацијата и влијанието што ги имаше Советскиот Сојуз, а Србија се обидува да го стори истото во својот регион, рече Ѓукановиќ.
Според него, тоа се ретроградни политики кои не сакаат да управуваат со нивните земји, туку со своите народи.
„Србија се обидува да владее и да поставува прашања во Црна Гора, Босна и Херцеговина, Косово и Северна Македонија, а таа политика, за жал, сè уште не добива соодветен одговор од нашите партнери од Запад“, рече Ѓукановиќ.
Зборувајќи за претседателските избори и можното руско влијание врз нив, Ѓукановиќ вели дека би сакал да може да потврди дека Русија не се меша, туку вели дека „тоа е само илузија“.
„Рускиот свет е ист како и српскиот свет. Руската политика во нивниот регион е еднаква на српската политика во нашиот регион, а најважни инструменти на двете политики се православната црква. И српската и руската црква денес се занемарливо верски организации, тие се апсолутно политички организации“, рече Ѓукановиќ.
Жали, додаде, што на сите негови „навремени предупредувања од 2016 година немало поадекватна реакција од некои од западните адреси“.