Претставници на повеќе од 80 земји се собраа денеска во Давос, Швајцарија, со намера да формираат заедничка платформа за мировниот план за Украина, предложен од нејзиниот претседател Володимир Зеленски. Швајцарските коорганизатори на состанокот признаа дека се уште е далеку од можно Русија да се приклучи на такви разговори.
Советници за национална безбедност од 83 земји учествуваа во четвртиот круг дискусии, врз основа на предлогот од 10 точки на Зеленски за праведен и траен мир во Украина, речиси две години по почетокот на руската инвазија.
Со разговорите копретседаваа началникот на кабинетот на украинскиот претседател Андриј Јермак и швајцарскиот министер за надворешни работи Игнасио Касис.
Тие се одржаа во луксузниот ски-центар Давос, во источна Швајцарија, пред почетокот на петдневниот самит на Светскиот економски форум, кој ја обединува светската економска и политичка елита.
Касис рече дека претставници на 83 држави дошле во Давос за да разговараат за мирот, начините за постигнување мир во Украина, но и во други земји каде има конфликти.
„Ќе мораме некако да најдеме начин да ја вклучиме Русија. Нема да има мир ако не и дадеме збор на Русија. Но, тоа не значи дека треба да чекаме Русија да направи нешто. Секоја минута десетици цивили се убиени или повредени во Украина. Немаме право да чекаме вечно“, додаде швајцарскиот министер.
Три состаноци на ниво на советници за национална безбедност беа одржани во Копенхаген во јуни 2023 година, во Џеда во август и во Малта во октомври 2023 година.
Касис ја истакна важноста на учеството во преговорите на Бразил, Индија и Јужна Африка, кои се наоѓаат веднаш до Русија во рамките на групата БРИКС.
„Нивното учество е многу важно бидејќи тие имаат дијалог со Москва и одржуваат одреден степен на доверба“, рече Касис.