Американската актерка Ева Лонгорија, позната по улогата во серијата „Очајни домаќинки“, очекува дете од сопругот, мексиканскиот медиумски магнат Хозе „Пепе“ Бастон, соопштија светските медиуми. Според ABC News, актерката е во четвртиот месец од бременоста и очекува момче.
Ова бебе е прво за 42-годишната Лонгорија, која од претходни бракови нема деца. Во минатото, таа беше во брак со актерот Тајлер Кристофер и кошаркарот Тони Паркер.
49-годишниот Хозе „Пепе“ Бастон има три деца од поранешната сопруга, мексиканската актерка Наталија Есперон – 22-годишна ќерка Наталија и 14-годишните близнаци Маријана и Хозе. Третиот близнак на поранешната двојка, Себастијан, умира набрзо по раѓањето во 2003 година. Веста дека Ева Лонгорија и Хозе „Пепе“ Бастон очекуваат дете, беше потврдена од нивни претставници. Лонгорија и Бастон официјално стапија во брак во Мексико во 2016 година и тоа по тригодишна врска.