Американското Федерално биро за истраги (ФБИ) апелираше до граѓаните да се воздржат од користење места или станици за полнење телефони на аеродроми, хотели и други јавни места, бидејќи постои ризик од злоупотреба и хакирање на уредите.
„Избегнувајте користење места за полнење на аеродроми, хотели или трговски центри. Постојат начини за јавно користење, односно злоупотреба на USB-портите за уфрлување вируси и софтвер на уредите“, велат од ФБИ.
Во соопштението се советуваат луѓето да понесат свој полнач и USB-кабел и да користат штекер.
ФБИ не е единствената федерална агенција која издаде предупредување за полначот на телефонот. Федералната комисија за комуникации (ФКК) исто така соопшти дека USB-портите може да се злоупотребуваат за да се внесат вируси во уредите на корисниците кои целосно не се свесни за тоа што се случува. Оваа тактика е позната како „juice jacking“.
Таквите вируси можат да обезбедат пристап до чувствителни податоци, вклучително и лозинки, кои може да се користат за различни форми на кражба на идентитет.
Одредени уреди, вклучително и некои iPhone-и, нудат заштита од „juice jacking“ со предупредување на корисниците за небезбедна или несигурна врска, но софистицираниот вирус може да ги заобиколи сите предупредувања.