Една обемна шпанска студија за коронавирусот откри дека само 5% од населението во земјата развило антитела на „Ковид-19“, што дополнително ги поддржува претходните докази дека е речиси невозможно да се постигне колективен имунитет без голем број на жртви.
Според наодите од студијата, 95% од населението во Шпанија сè уште е подложно на коронавирус, што е далеку од постигнување на таканаречениот „имунитет на стадото“. Колективниот имунитет се јавува кога доволно голем дел од населението ќе се зарази со вирус или бактерии и се стекнува со имунитет, или ако се развие ефикасна вакцина која спречува понатамошна циркулација на инфекцијата.
Европскиот центар за контрола на болести објави дека ова е еден од најголемите европски серолошки тестови за ковид-19. Студијата беше спроведена на 61.000 испитаници.
Слични студии во Кина и САД исто така покажаа дека поголемиот дел од населението не е изложено на коронавирус, дури и во области каде има повеќе жаришта и значителен број заразени лица.
„Имајќи ги предвид овие откритија, секој пристап кон пандемијата што сугерира да се постигне колективен имунитет по природна инфекција не е само неетички, туку и недостижен“, рече вирусолог на Лансет, Изабела Екерле, раководител на Женевскиот центар за вирусни болести и вирологот Бенџамин Мајер од Универзитетот во Женева.
Лекарите сè уште не се сигурни колку долго антителата обезбедуваат заштита или дали целосно нè штитат од повторна инфекција.
Истражувањето беше спроведено од водечки шпански владини агенции за истражување и епидемиологија, а започна во април, додека земјата беше под строг карантин.
„Релативно ниската инциденца забележана во контекст на интензивна епидемија во Шпанија може да послужи како референца за другите земји. Во моментов е тешко да се постигне колективен имунитет без колатерална штета, односно без голем број смртни случаи кај ранливите популации и преоптовареност на здравствениот систем“, се вели во студијата.
Марина Полан, водач на студијата и директор на Шпанскиот Национален центар за епидемиологија, изјави за Си-Ен-Ен дека многу експерти веруваат дека „колективниот имунитет бара развој на антитела кај 60 проценти од населението“.
Шпанија беше една од земјите во Европа која беше погодена од пандемијата на коронавирус. Досега во земјата се пријавени над 290.000 случаи и најмалку 28.000 смртни случаи.
Треба да се напомене дека во урбаната област на Мадрид, која беше најтешко погодена од ковид-19, беше забележано дека повеќе од 10 проценти од популацијата развија имунитет, додека во густо населената Барселона, 7 проценти од граѓаните имаат антитела. Од друга страна, многу други крајбрежни региони имаа далеку пониски стапки на имунитет.
Според резултатите од првата фаза од ова истражување, спроведено од 27 април до 11 мај, 5% од шпанското население развило имунитет. Резултатите од втората фаза беа објавени на 4 јуни, покажувајќи дека 5,2 проценти од Шпанците имаат антитела. Резултатите од третата и последната фаза беа објавени денес и ги потврдија податоците од претходната фаза, односно дека само 5,2 проценти од шпанското население развиле имунитет на ковид-19.