Портпаролот на косовската влада, Розафа Кељменди за „Коха“ изјави дека тужба за геноцид против Србија ќе биде поднесена пред Меѓународниот суд на правдата (МСП) пред крајот на следната година, пренесува порталот „Косев“.
Според неа, потребна е голема подготовка.
„Пред да се подготви тужбата, потребно е да се финализира работниот план, кој содржи многу технички аспекти што се вклучени во овој план. Откако ќе заврши процесот на изготвување на овој план, може да започне изготвување на тужба. „Немаме точен датум за поднесување на тужбата, но тврдиме дека не можеме да го поднесеме пред крајот на следната година, имајќи предвид дека е потребна голема подготовка“, рече Кељменди.
Премиерот Албин Курти рече дека ова е планот во неговиот прв говор во Собранието, откако пред еден месец беше избран за премиер.
Неколку експерти стравуваат дека Косово може да не го добие случајот, бидејќи првиот пат овој суд донесе одлука дека прогласувањето независност не е во спротивност со меѓународното право.
Кељменди вели дека е рано да се зборува за можните последици од пресудата, што потенцијално не може да утврди дека имало геноцид на Косово.
„Ние веруваме дека имало геноцид на Косово и ќе се обидеме да го докажеме тоа. Во оваа фаза не е соодветно да се зборува за последиците од таквата можна пресуда, бидејќи таа сè уште е во прва фаза. Сега се занимаваме со прашањето за надлежност и внатрешни и надворешни анализи на домашни и меѓународни експерти, кои ги разгледуваме во врска со можностите што ги има Косово за да ја поднесе оваа тужба“, рече владиниот портпарол, пренесе „Косев“.
„Бидејќи овој процес е исклучително сложен. Треба да се има предвид дека една од работите што е многу важна во целиот овој процес е огромната работа што се работи зад сцената, бидејќи имаме работа со тужба што е покрената директно против друга држава и бара дополнителна грижа. Процесот на тужбата на Србија за геноцид е долг, сложен и многу чувствителен процес, па како таков ќе биде потребно време“.
Истиот суд утврди дека убиството на околу 8.000 босански муслимани во Сребреница е геноцид. Според МСП, Србија не го спречи тоа, но беше соопштено дека судот нема доволно докази за да ја смета земјата одговорна за геноцидот.