СДСМ како носител на извршната власт има во интерес изборниот процес да понмине во крајно демократски амбиент и демократски услови, зашто не сакаме да се фрли дамка на изборниот циклус на редовните парламентарни избори и претседателските избори, кои се одржуваат по 5 години, истакна синоќа координаторот на пратеничката група на СДСМ, Мартин Костовски, во емисијата „24 Анализа“.
Костовски додаде дека увертира е со формирањето на техничката влада, во комисијата за избори и именувања се откочи процесот за избор на новиот член на ДИК, кој на следната пленарна седница треба да биде избран со 2/3 мнозинство.
-Во интерес е на државата како членка на НАТО алијансата, како држава која преферира да започне преговори ден поскоро и во сите нас кои сме демократи по убедување, борци за една поинаква Македонија, сакаме да нема ниту една дамка на изборите, рече Костовски.
Костовски истакна дека СДСМ е во постапка на именување кандидат за претседателските избори.
-Имаме голем кадровски потенцијал, што е наша среќа и наше богатство Предложени се голем дел имиња, од поранешни претседатели на партии, поранешни претседатели на државата, поранешни генерални секретари, истакнати современици во општеството. Јас едно можам да кажам сигурен сум дека кандидатот на СДСМ ќе биде личност, којашто ќе биде идниот претседател на државата, порача Костовски.