Специјалниот претставник на ЕУ, Мирослав Лајчак, рече дека разговорите што ги одржал денес и вчера во Брисел се јасен знак дека Унијата е многу заинтересирана за Западен Балкан и силно го поддржува дијалогот Белград-Приштина.
„Денес ги продолжив вчерашните разговори со министерот за надворешни работи на Финска и државниот секретар на Чешка за европски прашања. Последните два дена се јасен знак дека ЕУ е многу заинтересирана за Западен Балкан и дека силно го поддржува дијалогот меѓу Белград и Приштина под покровителство на Унијата“, напиша Лајчак вечерва на Твитер.
Тој вчера на социјалната мрежа изјави дека го искористил присуството на министрите за надворешни работи на земјите-членки на ЕУ во Брисел за да разговара за регионалните прашања од Западен Балкан и ситуацијата во дијалогот меѓу Белград и Приштина.
Лајчак, специјалниот претставник на ЕУ за дијалог меѓу Белград и Приштина и други регионални прашања од Западен Балкан и поранешен шеф на словачката дипломатија, разговараше вчера со министрите за надворешни работи на Австрија, Словенија, Чешка, Словачка, Унгарија, Романија, Естонија и Грција.