Германскиот трговски синџир „Лидл“ ја регистрираше својата компанија во Македонија. Придружницата на Лидл Северна Македонија Дооел со седиште во скопски Центар ќе биде управувана од бугарската филијала, а паричниот влог изнесува 500.000 евра, објави вчера Централен регистар.
Сопственик е германската матична компанија ВЕ-Интернационал Цвајте ГмбХ од Некарзулм, но субјектот специјализиран за трговија на мало претежно со храна, пијалаци и тутун ќе биде управуван од Софија, од бизнисмените Милена Емилова Драгијска, Бисер Борисов, Инчовски и Љубомир Манолов Хрсев. „Лидл“ планира да вложи над 10 милиони евра во продавница и да купи земјиште поголемо од 10.000 квадратни метри.
Во моментов „Лидл“ има 100 продавници во Бугарија на 49 локации и вработува 3.000 работници, а има експанзионистички план за оваа година за отварање на уште пет маркети и вработување на уште 250 луѓе. Нето-профитот за 2019 во Бугарија бил 41,25 милиони евра.