Францускиот претседател Емануел Макрон побара од неговиот турски колега Реџеп Таип Ердоган да го „почитува суверениот избор“ на Финска и Шведска да се приклучат на НАТО.
Тој се надева дека ќе избегне Анкара да стави вето на нивните барања за приклучување кон Трансатлантската одбранбена алијанса.
Турција во средата предупреди дека процесот на пристапување во НАТО за Шведска и Финска нема да се придвижи напред доколку не ги реши безбедносните грижи на Анкара, наведувајќи ги нивните наводни симпатии кон курдските милитантни групи.
„Претседателот Макрон ја нагласи потребата да се почитува суверениот избор на двете земји, кој произлезе од демократскиот процес и како одговор на промените во нивната безбедносна средина“, соопштија од неговиот кабинет по телефонскиот разговор со Ердоган.
Тој рече дека се надева оти разговорите ќе продолжат брзо и дека ќе се најде решение.