Менаџерот на Манчестер Јунајтед, Ерик тен Хег, се повеќе сака да се раздели со напаѓачот Кристијано Роналдо. На Холанѓанецот почнува да му е преку глава од однесувањето на 37-годишниот Португалец, кој не прави ништо за да се извлече од тешката ситуација во која се наоѓа тимот, пишува „Атлетик“.
Роналдо прво го пропушти целиот претсезонски камп на „црвените ѓаволи“ поради „лични причини“. Тој потоа се појави во базата со својот агент и побарал трансфер. Тен Хаг во меѓувреме постојано правел напори да го убеди Португалецот да остане. Тој сакал да го има на располагање искусниот фудбалер и се надевал дека ќе може да смета на него како лидер кој ќе го води тимот во вистинската насока.
Откако се покажа дека нема многу луѓе кои сакаат да го привлечат, Кристијано реши да го прекине бојкотот и да се врати на „Олд Трафорд“. Сепак, тоа не се одразува баш најдобро на ситуацијата во соблекувалната. Се вели дека често седи сам за време на ручекот и подалеку од соиграчите. Покрај тоа, тој постојано се жали на тренинзите и се расправа со тренерот поради високиот пресинг што сака да го наметне.
Исто така, за време на поразот од Брентфорд од 4:0, Роналдо не покажа ништо импресивно со својата игра, туку само мавташе со рацете и се лутеше на грешките на соиграчите. По мечот тој повторно не се поздрави со навивачите на „црвените ѓаволи“, по што размени зборови со помошниот тренер Стив Мекларен.
Сето ова предизвика Тен Хаг нагло да го смени ставот за Роналдо и повеќе не го сака во својот тим. Шефовите исто така се подготвени да го продадат, но прво сакаат да се уверат дека можат да најдат замена за него. Во моментов, сепак, тоа се покажува како тешка задача, бидејќи клубот се разминува со голем број имиња меѓу кои Мауро Икарди, Раул де Томас, Марко Арнаутовиќ и Алваро Мората.
Така, ситуацијата останува во ќорсокак, но нема да биде чудно таа да се смени до крајот на преодниот рок.