Соработниците на затворениот руски опозициски лидер Алексеј Навални најавија дека го бараат веќе 13-ти ден откако тој денеска не се појави на суд.
Портпаролката на Навални, Кира Јармиш, напиша на X, порано познат како Твитер, дека Навални имал закажани повеќе сослушувања, од кои некои биле прекинати откако жестокиот непријател на претседателот Владимир Путин не можел да биде лоциран за да учествува лично или преку видео врска.
Каде се наоѓа 47-годишниот Навални е непознато откако неговите адвокати изгубија контакт со него по 6 декември. Неговите помошници веруваат дека намерно го кријат откако Путин ја објави својата кандидатура на претседателските избори во Русија во март.
„Алексеј е главниот противник на Путин, иако неговото име нема да биде на гласачкото ливче. Ќе направат се што можат за да го изолираат“, изјави Јармиш за „Асошиејтед прес“.
Тимот на Навални започна кампања за да ги охрабри Русите да ги бојкотираат изборите или да гласаат за друг кандидат.
Помошниците рекоа дека на бранителот во петокот му било кажано дека Навални бил преместен од казнената колонија источно од Москва, каде што отслужува 19-годишна затворска казна под обвинение за екстремизам, но не е прецизирано каде е одведен.