Бугарскиот претседател Румен Радев побара од втората по големина партија во парламентот да формира влада, во обид да го спречи одржувањето на петтите парламентарни избори во последните две години.
Иако шансите за успех на реформистичката партија Продолжуваме со промената се мали, нејзиниот мандатар Николај Денков вети дека ќе се обиде да создаде работна коалиција.
Денков (60), професор по хемија и поранешен министер за образование, ќе има една недела да предложи кабинет, кој потоа треба да биде одобрен од парламентот.
„Многу проблеми се наталожија, реформите се одложуваат и ни треба влада која ќе ги обедини луѓето и ќе ги решава нивните проблеми“, рече тој.
Кабинетот ќе има потреба од поддршка од 121 член од 240-членото Национално собрание за да ја преземе функцијата.
Партијата на Денков, која ја предводеше владејачката четирипартиска коалиција која пропадна во јуни, има 53 пратеници.
Потегот доаѓа откако главната група во парламентот, централно-десничарската партија ГЕРБ, не успеа да стави крај на последната политичка криза во земјата од Европската унија и членката на НАТО во услови на растечки економски проблеми и зголемени тензии со Русија.
Доколку Денков не успее да собере мнозинство, што според аналитичарите е повеќе од веројатно, претседателот мора да избере трета партија која ќе се обиде да формира владина коалиција, во спротивно ќе го распушти парламентот и ќе распише предвремени избори на пролет.
Политичките аналитичари очекуваат дека новото гласање би можело да има сличен исход и да го продлабочи политичкиот ќор-сокак во најсиромашната членка на ЕУ.