Катастрофалната железничка несреќа во Грција, која однесе 57 животи, од ден на ден отвора нови поглавја кои сведочат за неверојатни пропусти, скандалозна корупција и несфатлива негрижа на властите.
Најпопуларните грчки медиуми детално известуваат за болните сцени од погребите и збогувањата на членовите на семејствата од „жртвите на државата“, како што се почесто се пишува за загинатите во „возот на смртта“ на линијата Атина-Солун, пренесе „Новости.рс“.
Од друга страна, премиерот Киријакос Мицотакис прави максимални напори да ја ублажи болката на семејствата и „што е можно поскоро“ да ги изведе пред лицето на правдата одговорните за трагедијата. Тој упати уште едно извинување до семејствата, изрази сочувство и најави остра реакција на државата.
Во исто време, веројатно свесен дека расположението во јавноста нема толку брзо да се смени, најавува одложување на датумот за избори, во кој веќе се „виде“ себеси како победник. Имено, некогашната комотна предност од 15 проценти во однос на Алексис Ципрас и неговата Сириза, се стопи од 6,5 непосредно пред „катастрофата во Темби“, па може да се претпостави дека сега расположението на гласачкото тело е крајно неизвесно.
Но, Мицотакис покажа дека е претприемнички политичар и дека знае како да се справи со проблемите. Тој е во близок контакт со лидерите од Брисел, а веќе оваа недела ќе пристигне експертска комисија од ЕУ за да се вклучи во истрагата. Грците добро запознаени со „европските експерти“ иронично коментираат дека е подобро тие експерти да испраќаат предлози и решенија преку „Вајбер“.
Премиерот не се двоуми да ги нарече работите со нивното вистинско име и не е изненадување што преку изјава се извини во негово име и во име на сите претходни влади. Логично!
Требаше да се случи ваква несреќа за да излезе џинот од шишето и конечно да дознае што се случило со грчките железници во минатиот век, а особено интересни се последните педесет години откако земјата влезе во ЕУ.
Од 1980 година, договорите за железничка сигнализација се платени за околу 460 милиони евра.
Никогаш не работеле со полн капацитет. Присвојувањето на земјиштето за изградба на пруга на Пелопонез било платено 80 отсто повеќе отколку за истата намена при изградба на автопати.
Долговите на грчките железници во првата деценија на овој век изнесуваат 10 милијарди евра или пет пати повеќе отколку на „Олимпик ервејс“, кој во меѓувреме е приватизиран.
Примери има безброј и се поставува прашањето колку „важни партиски барони“ ќе треба да одговорат во бројните истраги. Се шушка дека специјалниот судија веќе има список со кандидати за „судењето на векот“.
Инаку, уапсениот шеф на станицата во Лариса, чија одисеја до кобната функција шеф во Лариса, заслужува посебна приказна, побарал дополнителна изјава преку својот адвокат. Се чини дека според прописите на службата, во моментот на судирот не смеел да биде сам на контролниот пункт.
Се наведува дека било наредено да се истражат сите околности под кои надзорникот на шефот на станицата во Лариса итно отворил боледување, во време кога било јасно дека катастрофата веќе се случила. Премиерот лично нареди опсежна истрага.
Оштета
Според европските прописи, доколку патник е повреден или загинат во железничка несреќа, компанијата е должна на семејството прво да му исплати аванс, а потоа целосна оштета во рок од 15 дена по утврдувањето на идентитетот. Проценките велат дека за секоја жртва на семејствата ќе им бидат исплатени најмалку 20.000 евра.