Грчките медиуми ги пренесуваат пораките на американскиот секретар за одбрана околу условот за покана на Македонија во НАТО – решение на спорот за името. Димитров и Коѕијас на нова средба во Солун.
„САД до ПЈРМ: Прво решение за името, па пристапување во НАТО“. Под овој наслов грчките медиуми ја пренесуваат пораката од американскиот секретар за одбрана, Џејмс Матис, по вчерашната средба во Вашингтон со македонската министерка за одбрана, Радмила Шекеринска.
„САД ја афирмираат одлуката на НАТО во Букурешт во 2008 година, Македонија да добие покана за членство веднаш штом ќе се постигне заеднички прифатливо решение на прашањето за името со Грција. Ја поздравуваме вашата работа со Грција на разрешувањето на ова прашање и се надевам дека наскоро ќе има резултати. Не сакаме да ве видиме запрени пред вратите на НАТО“, изјави Матис.
Дел од медиумите потсетуваат дека тој став претходно го искажал и шефот на грчката дипломатија, Никос Коѕијас, објаснувајќи од што зависи решението: „За да добие покана за НАТО на Македонија, треба да има договор за ерга омнес“.
Истите ставови Коѕијас ги повторил и во вчерашното интервју за грчката ТВ „Скај“. Тој изјавил дека за првпат двете земји се толку блиску до договор, но решението зависи од тоа дали Македонија ќе прифати име за внатрешна и за меѓународна употреба.
„Тие велат дека не можат да го имаат истото име како и надвор“, рекол Коѕијас, објаснувајќи какви се македонските позиции.
Запрашан дали постои можност за т.н. „привремен прием“ на северниот сосед во НАТО додека да се реши спорот, Коѕиас изјавил дека тоа би било проблематично и дека Грција не би се согласила со тоа без постигнато решение.
Награда за конструктивност
Во исто време, дел од медиумите анализираат дали некои од сегашните грчки позиции во однос на решението за името би можеле да бидат релативизирани од Атина, пред сѐ поради прагматични внатрешни причини. Притоа ги нагласуваат индициите дека Грција би можела до добие „повеќе дарежливи аранжмани за отпишување на долговите, ако на позитивен начин се справи со спорот за името“. Според анализите, се смета дека тоа може да ѝ донесе голема политичка полза на владата: поени заради решавање на еден од хроничните проблеми во надворешната политика, но и полабав надзор на кредиторите врз грчката економија, кој би бил „со сосема поинаква фреквенција и содржина за разлика од оној во Португалија, Ирска или Кипар“.
Во тој контекст ги ставаат и наводите од упатени извори, дека во разговорите може да се дојде и до решение за употребата на името „Македонија“ во одредени аспекти на внатрешните работи на соседната земја. Можноста грчката конструктивност да биде наградена ја поврзуваат и со можноста владата да отстапи од најавеното намалување на пензиите, фиксирано за 1-ви јануари 2019 година. „Та неа“ уште во средината на април објави дека Атина ќе добие „подарок“ од Берлин ако се постигне решение за името. Повикувајќи се на европски извори, весникот објави дека во таков случај антикризната мерка за кратење на пензиите би се одложила за шест месеци подоцна, што би му одело во прилог на Ципрас и на неговите изборни планови. Грчката влада остро ги демантираше ваквите наводи.
Нова средба во Солун
Надвор од овие шпекулации, извесно е дека е на повидок е нова епизода во разговорите за името. Министерот за надворешни работи Никола Димитров и неговиот грчки колега Никос Коѕијас, ќе имаат можност за нови разговори на маргините на третата по ред, четирипартитна средба на министрите за надворешни работи на Грција, Албанија, Бугарија и Македонија, што ќе се одржи во Солун на 3-ти и 4-ти мај. На средбата, покрај министрите за надворешни работи, ќе учествуваат министри и високи претставници од министерствата за внатрешни работи и за транспорт на четирите земји, пишува Дојче Веле.