Денес, УСАИД и Владата на С. Македонија го потпишаа Договорот за грант за партнерство за развој, со кој се обврзува до 8,2 милиони долари годишно за Владата на Северна Македонија да го преземе водството во развојот, финансирањето и спроведувањето развојни програми во соработка со УСАИД во следните пет години, соопштија од американската амбасада.
Според нив, овој договор ги редефинира односите со македонската влада, „придвижувајќи нè од традиционалната врска донатор-примател во соработка со партнерство за да оствариме одржливи резултати“.
„Следната година, ќе работиме со владата за подобрување на економската конкурентност, намалување на корупцијата и зголемување на придонесите на младите во општеството“, велат од амбасадата.
Американската амбасадорка во земјава Кејт Брнз денеска во обраќање на потпишувањето на договорот за грант меѓу Северна Македонија и САД оцени дека земјава постигнала евидентен напредок по потпишувањето на Преспанскиот договор и влезот во НАТО, но порача дека тој чекор мора да се одржува.
„Периодот кој следи ќе биде од пресудно значење на иднината на Северна Македонија како просперитетен сојузник кој придонесува за стабилноста во регионот. По попишувањето на историскиот Преспански договор во 2018 година, како и влезот во НАТО и зеленото светло за пристапни преговори со ЕУ во 2020 година, Северна Македонија оствари евидентен чекор напред. Но, овој чекор мора да се одржува и шансата мора да се искористи дури и во времиња полни предизвици. Знаеме дека во иднина може да има предизвици, како што се корупцијата, непотизамот, дури и нефункционални институции, со што се попречува патот на Северна Македонија кон зацртаните цели“, рече Брнз во своето обраќање.