На Запад се појасно зборуваат за нивната намера да конфискуваат руски имот, изјави денеска заменик министерот за надворешни работи на Русија, Сергеј Рјабков и додаде дека во тој случај Москва сигурно ќе одговори со иста мерка, иако сега не е време да се открие како.
„Не очекуваме разумни дејствија од западните противници, какви било чекори кои покажуваат макар и минимално разбирање за тоа колку е штетна и контрапродуктивна самата дискусија на оваа тема“, рече Рјабков.
Но, како што вели, станува јасно дека оваа идеја „добива се поконкретна форма“, иако се уште не е реализирана.
Да потсетиме, руските средства се замрзнати во голем број западни земји. Москва постојано предупредуваше дека конфискацијата на тој имот и неговата понатамошна употреба за обнова на Украина, што некои официјални лица ја најавуваат како опција, би биле незаконски. Русија нагласува дека е подготвена за дијалог, но нејзините експерти оценуваат дека нема многу причини за оптимизам.