Трамп: Го направив НАТО силен, парите почнаа да доаѓаат по мојата изјава

од Stefanija Kuzmanovska
407 прегледи

Американскиот претседателски кандидат Доналд Трамп во понеделникот тврдеше дека го „направил НАТО силен“ за време на својот претседателски мандат, откако неговиот повик до Русија да ги нападне земјите-членки на одбранбената алијанса кои не ги исполнија финансиските обврски, предизвика бес.

„Го направив НАТО силен“, напиша со големи букви републиканскиот фаворит за претседателските избори во САД во 2024 година на социјалната мрежа Truth Social, која тој ја основа.

„Кога реков дека 20-те земји кои не го плаќаат својот фер дел мора да платат и дека ако не платат, нема да имаат американска воена заштита, парите почнаа да доаѓаат“, рече Трамп.

„По толку многу години кога САД плаќаа за другите, тоа беше прекрасна глетка“, истакна тој, „Но, сега, кога не бев таму да кажам дека мора да платат, тие се вратија на старите начини“.

На настанот на кампањата во Јужна Каролина во саботата, Трамп наведе дека „нема да ги заштити“ од Русија земјите кои не ги исполнуваат барањата на НАТО за одбранбени трошоци.

„Всушност, би ги охрабрил да прават што сакаат“, рече Трамп, мислејќи на Русија, доведувајќи ги во прашање обврските за колективна одбрана на Алијансата.

Не е јасно дали Трамп некогаш имал таков разговор со претседател на друга земја.

Коментарот на Трамп предизвика бурни реакции во Европа, каде свежи се сеќавањата за скептицизмот на Трамп кон трансатлантската алијанса.

Тој предизвика мал бес во 2017 година кога го нарече НАТО „застарен“, а за време на неговиот мандат често обвинуваше дека САД плаќаат неправеден дел како членка.

Слични содржини