Претседателот на САД, Доналд Трамп, кој се кандидира за втор претседателски мандат на изборите на 3 ноември, врши притисок врз здравствените власти да развијат и одобрат вакцина против коронавирусот што е можно поскоро.
„Длабоката држава, или кој и да е, преку Агенцијата за лекови им отежнува на фармацевтските компании да најдат кандидати и да ги тестираат за вакцината. Тие очигледно се надеваат дека ќе го одложат изнаоѓањето решение по 3. ноември. Фокусот треба да биде на брзината и спасување на животи“, напиша Трамп на Твитер.
Твитот беше насочен кон Стивен Хан, шеф на Управата за храна и лекови (ФДА).
Трамп порано рече дека се надева оти вакцината ќе биде произведена до претседателските избори, јави ДПА. Тој се соочува со силна критика за неговиот став кон епидемијата, која однесе 175 илјади животи во таа земја и зарази повеќе од 5,6 милиони луѓе.
Експертите предупредуваат дека секое политичко мешање во тестирањето на вакцините и процесот на одобрување може да ја загрози вакцината и да ја загрози нејзината безбедност и легитимност.
Сите стравови за вакцината може да доведат до пониска стапка на вакцинирање, што ќе ја отежни борбата против пандемијата.
Хан во неколку наврати рече дека ФДА ќе се придржува кон вообичаените строги научни процедури, додавајќи дека не се соочила со притисок да ги промени своите критериуми.
Во тек се големи клинички студии кои опфаќаат до 30.000 испитаници. Доколку се спроведе до есен, ФДА би можела да започне со процесот на одобрување на вакцината, која е инаку скапа и одзема многу време.
Владини експерти на САД, вклучувајќи го и главниот специјалист за заразни болести, Ентони Фаучи, веруваат дека вакцината би можела да биде достапна во почетокот на 2021 година.