Раперот Канје Вест, познат и како Је, јавно ѝ се извини на еврејската заедница.
Минатата година тој предизвика бурни реакции во јавноста кога на Инстаграм инсинуираше дека раперот Диди е контролиран од Евреите.
Објавата на Вест се состоеше од видео клипови на кои тој разговара со Диди за контроверзните маици „White Lives Matter“ кои ги носеше на модна ревија во Париз. После сето тоа, Канје Вест добил повик од Музејот на холокаустот во Лос Анџелес, кој му порачал да се образува.
„Зборовите се важни и имаат последици. Ве покануваме да го посетите Музејот на холокаустот во ЛА за да разберете како зборовите можат да предизвикаат ужасно насилство и геноцид“, стоеше во соопштението на музејот, по што многу познати личности реагираа и го осудија Канје.
Вест сега повторно се огласи на Инстаграм и им се извини на сите Евреи.
„Искрено ѝ се извинувам на еврејската заедница. Не ми беше намерата да ги повредам или понижам и длабоко жалам за каква било болка што можеби сум ја предизвикал. Посветен сум да почнам од себе и да учам од ова искуство за да обезбедам поголемо разбирање во иднина. Вашата прошка ми е важна, а јас сум посветен на поправка на штетата и доближување на единството“, напиша Канје на хебрејски.