Првиот човек на Регулаторната комисија за енергетика, Марко Бислимоски информира дека до крајот на месецов ќе се донесе одлуката за цената на парното.
-Понеделник или вторник ќе ја донесеме одлуката за цената на топлинската енергија бидејќи завршув 2023 година. Она на што инсистиравме и баравме последните четири месеци е исполнето. Започнаа активности на мостот „Беласица“. При носењето на одлуката ќе одиме со претпоставка дека мостот е целосно во функција и со таа енергија од ТЕ-ТО ќе влеземе во нашите калкулации, рече денеска Бислимоски.
Нагласи дека РКЕ нема да дозволи никакви ценовни шокови.
-Вообичаено има инфлација, зголемени трошоци за набавка на одредени материјали како што е во сите индустрии, но најголемиот трошок се однесува на цената на природниот гас и на топлината која треба да се набави од ТЕ-ТО. Во најголем дел при носењето на одлуката за цената ќе бидеме сконцентрирани токму на овие трошоци. Со оваа одлука треба да се врати и заемот што го даде Владата во јануари 2022 година. Дали заемот ќе го вратиме одеднаш или на одреден период зависи како ќе изгледаат резултатите за крајната цена, прецизира Бислимоски.