За да го поддржиме авганистанското население, ќе мора да се поврземе со новата влада во Авганистан, што не значи признавање. Тоа е оперативен ангажман, рече високиот претставник на ЕУ за надворешна политика, Жосеп Борел.
Тој додаде дека овој ангажман ќе се интензивира во зависност од однесувањето на владата во Кабул, односно од фактот дека Авганистан нема да служи како „база за извоз на тероризам во други земји“ и дека ќе ги почитува човековите права, владеењето на правото и медиумите.
Според него, Авганистан, исто така, ќе мора да формира инклузивна, репрезентативна транзициска влада, да обезбеди слободен пристап до хуманитарната помош и да дозволи странски државјани и Авганистанци да ја напуштат земјата.
Борел нагласи дека ЕУ има за цел да ги координира своите контакти со талибанците преку заедничко присуство на ЕУ во Кабул за да ги следи евакуациите и да се осигура дека новата авганистанска влада ќе ги исполни обврските како што се безбедноста и човековите права.
-Одлучивме да работиме координирано, да ги координираме нашите контакти со талибанците, вклучително и преку заедничко присуство на Европската унија во Кабул, доколку се исполнети безбедносните услови, рече Борел.