ДУИ е загрижена поради неодамнешните резултати од руските избори и на териториите надвор од Русија. Од партијата од Мала Речица, старо-новиот руски претседател го нарекуваат „диктатор“.
-Според Изборната комисија на Русија, за Путин гласале 88,1 отсто од руските граѓани кои живеат во нашата земја. Ова докажува дека руската политика е присутна, не се откажува и продолжува секој ден се повеќе да се обидува да го загрози европскиот пат на Северна Македонија и да уништи се што земјата постигнала во последните години. Во руското сценарио на Путин, политичките партии во Македонија веќе долго време гласно се набројуваат, а на истите неодамна им помага и албанската опозиција која секојдневно ги клевети, навредува и дезинформира граѓаните дека ДУИ е злото на земја, а не ВМРО-ДПМНЕ и Левица, велат од ДУИ преку соопштение.
-Демократската унија за интеграција не сака да верува дека албанската опозиција е свесно поврзана за руските сценарија, туку апелира да размислува и да води кампања демократски и европски, земајќи ги за пример ДУИ и идниот претседател Бујар Османи, се додава во партиското соопштение.
Руските државјани кои гласаа на изборите за претседател на таа земја во руската амбасада во Скопје му дале најголема поддршка на актуелниот претседател Владимир Путин. Како што пренесе РСЕ, според податоците на руската Централна изборна комисија, Путин освоил 88,10 отсто од гласовите, додека кандидатот Владислав Даванков добил поддршка од 5,71 отсто од Русите кои живеат во Македонија.
Другите двајца кандидати, Леонид Слуцки и Николај Харитонов, освоиле помалку од еден отсто од гласовите. Од земјите од Западен Балкан, покрај Македонија, Путин победил убедливо и во БиХ.