Дузина автомобили со македонски регистарски таблички се искршени на грчките туристички места, Калитеа и Афитос. Според сликите објавени на социјалните мрежи, искршени се стаклата од возилата и има дупнати гуми.
-Ова е срамен чин на најобични будали врз основа на кој цел народ ќе биде окарактеризиран како таков. Ако некој од вас е меѓу нив, веднаш отидете во полиција во Касандра, многумина веќе пријавиле и инсистирајте да се погледнат камерите долж целиот пат бидејќи тоа не се случило на едно место, туку на неколку локации, стои во објавата на Фејсбук-групата „Grcka uzivo“, каде многу туристи од Македонија и Србија објавуваат за новости, поплаки и известувања околу патувањата во Грција.
Според објавата, станува збор за околу 20 возила со македонски таблички.
Една членка на Фејсбук-групата ги предупреди и оние кои се во близина на овие места да ги преместат своите автомобили со цел да ги заштитат, од како што вели, вандали и ултранационалисти.