Заменичката министерка за финансии Гордана Димитриевска Кочовска во вечерашната дебата на телевизија Телма изјави дека државата очекува економска помош од 600 милиони евра во наредниот период. Но, според Кочовска и овие средства кои ќе бидат позајмени од ММФ, Светската банка и комерцијалните меѓународни банки нема да бидат доволни да ги покријат економските загуби кои ќе настанат поради коронавирусот.
-Ставивме потпис на писмата до ММФ и Светска банка и комерцијалните меѓународни банки за дополнителни средства како би ја надминале оваа криза од коронавирусот. Најдоцна до 5 мај ги очекуваме првите средства, а тоа се 400 милиони евра. Во однос на ММФ средствата ги очекуваме уште побрзо, додека пак од Светска банка немаме информации колку средства ќе ни се стават на располагање и кога ќе пристигнат во државата, вели Кочовска.
Таа додава дека не очекува никакви проблеми или доцнења околу префрлувањето на парите, но како што вели, прашање е колкава ќе биде цената за ова задолжување.
-Не очекувам да има проблеми при префрлувањето на парите, прашањето е колкава ќе биде цената. Сметам дека требаше ова побрзо да го направиме. Според проекциите овие средства најверојатно ќе ни бидат малку, вели Кочовска.