„Светските играчи би можеле да ја користат пандемијата на коронавирус за нова поделба на светот без војна“, рече претседателот на Белорусија Александар Лукашенко, додавајќи дека вкупно четири лица починале во земјата од смртоносниот вирус.
Во интервју за ТВ „Мир“, Лукашенко изјавил дека многу луѓе веќе се прашуваат: „Што ќе се случи после пандемијата?“
„Немате впечаток дека светските сили сакаат да го преобличат светскиот поредок со помош на т.н. психоза на коронавирус, вклучувајќи го и ширењето на инфодемија?“, праша Лукашенко.
Тој потсети на предлогот на ООН за печатење на пари во висина од 10 проценти од светскиот БДП за борба против економските последици од коронавирусот.
„Тоа се празни пари. Американскиот долар продолжува да ја губи вредноста како таков“, рече Лукашенко и додаде дека инфлацијата ќе дојде.
Тој рече дека е јасно каде Белорусија ќе заврши со својата рубља.
„Кој ќе ги собере тие илјадници милијарди, каде ќе завршат? Дали тоа нема да предизвика богатите да станат уште побогати, а сиромашните уште посиромашни? Се разбира, ќе предизвика“, рече Лукашенко.
Лукашенко истакна дека е загрижен за иднината на неговата земја.
„Сите велат: После пандемијата, светот ќе биде различен, и јас се согласувам, но каде ќе биде нашето место во овој нов свет? Тоа е главното прашање за мене, не оваа коронарна психоза и не инфодемијата“, истакна Лукашенко.
Тој додаде дека вкупно четири лица починале во Белорусија од воспаление на градите, предизвикано од компликации од коронавирусот.
Според Worldometers, вкупно 304 луѓе се заразени со коронавирус во Белорусија.