Нобеловецот Мајкл Левит, биофизичар од универзитетот Стенфорд, започнал да го анализира бројот на луѓе кои страдаат од Ковид-19 на крајот на јануари, врз основа на кои тој предвидел дека Кина ќе може да се справи со епидемијата многу порано отколку што предвидувале некои лекари.
Сега предмет на негова анализа е состојбата во САД и остатокот од светот, пренесува „Вашингтон пост“.
Додека бројните проценки предупредуваат дека ќе бидат потребни месеци, дури и години на социјална изолација и милиони човечки жртви, за да се спречи коронавирус, Левит смета дека податоците не поддржуваат такво сценарио, особено кога веќе се преземени строги мерки за изолација.
„Она што е потребно е контрола на паниката. Ако погледнеме пошироко, ќе бидеме во ред “, забележува овој научник.
Анализирајќи ги податоците за бројот на заразени лица во Кина, тој истакна дека иако бројот на заболени од ден на ден се зголемува, брзината на раст се намалува. Според него, фактот дека бројот на новозаразени не пораснал со голема брзина, кажува повеќе од самиот број на пациенти. Тоа бил првиот знак дека траекторијата на епидемијата се променила.
„Помислете на епидемијата како автомобил што вози по празен автопат. Иако автомобилот ја зголемува брзината, тој не забрзува како порано. Ова значи дека стапката на пораст на смртни случаи ќе опаѓа уште повеќе во текот на следната недела “, напиша Левит во извештајот на 1 февруари испратен до пријателите и кој бил широко споделен на кинеските социјални мрежи. Неговите предвидувања наскоро се оствариле: бројот на смртни случаи продолжил да опаѓа.
Тој сега ги анализира податоците за 78 земји кои регистрираат повеќе од 50 случаи заразени дневно. Сепак, не се фокусираше на вкупниот број заразени, туку на бројот на нови случаи и разликата од претходниот ден. Врз основа на ова, тој тврди дека иако бројките се големи, постојат знаци на побавен раст на бројот на пациенти.