Дневното зголемување на бројот на загинати од последиците од КОВИД-19 во Соединетите Американски држави надмина илјада четири дена по ред минатата недела, додека во земјата има дебати во врска со отворање училишта и задолжително носење маски, со мрачни проценки за стапката на смртност од оваа болест.
Вчера беа потврдени 900 нови смртни случаи во САД како резултат на инфекција со вирусот, помалку од претходниот ден, кога оваа бројка беше 1.130, пишува Си-Ен-Ен.
Според универзитетот „Џонс Хопкинс“, најмалку 146.460 луѓе починале од пандемијата КОВИД-19 во САД од почетокот на пандемијата. Центрите за контрола и превенција на болести во САД проценуваат дека може да има и до 175.000 смртни случаи поврзани со коронавирус во земјата до 15 август, додека Институтот за здравствени метрика и евалуација проценува дека тој број би можел да биде 165.000.
Ваквите мрачни проценки беа направени во време кога рекордно дневно зголемување на бројот на пациенти и смртни случаи во изминатите неколку недели беше забележано во неколку американски држави. Некои локални лидери објавија можност за повторно воведување на карантински мерки, додека пред неколку дена повеќе од 150 истакнати лекари, медицински работници, научници и други експерти потпишаа писмо во кое ги повикуваат властите да ја затворат земјата за да спречат ширење на вирусот.
Во писмото се вели дека Соединетите држави се на пат да загубат над 200 000 луѓе поради вирусот до 1 ноември. Писмото е упатено до администрацијата на претседателот Трамп, конгресмените и гувернерите на сојузните држави.