Американската министерка за финансии Џенет Јелен денеска ќе се сретне со претставници на американскиот Конгрес за да разговара за можното замрзнување на златните резерви на Русија. Овој потег уследи откако неколку претставници поднесоа предлог-закон за забрана на руското злато, кој треба да се фокусира на способноста на Русија да ги продаде своите златни резерви за да го избегне влијанието на санкциите.
Сегашните санкции наметнати на руските функционери, централната банка, претседателот Владимир Путин и другите мерки не влијаат на руските резерви што Путин ги акумулира во последните неколку години. Русија има околу 130 милијарди долари златни резерви, според претставници на американскиот Конгрес.
Банката на Русија на 28 февруари објави дека ќе продолжи да набавува злато на домашниот пазар на благородни метали.
Членовите на американскиот Конгрес размислуваат за построги санкции кон Русија во време кога претседателот Џо Бајден и претставници на администрацијата оваа недела се во Брисел и Варшава, каде што ќе се обидат со клучните сојузници да спречат руската војна во Украина да стане уште поголема катастрофа.
„Со нетрпение го очекувам разговорот со министерката Јелен за нашиот предлог-закон и какви дополнителни чекори може да преземе Министерството за финансии за да застане против Путин“, рече демократската сенаторка Меги Хасан.
„Не можеме да дозволиме Путин да ја искористи дупката во законот што може да му помогне да го финансира неговиот неразбирлив напад врз Украина“, рече таа.