Цените на храната паднаа во јуни за прв пат по една година, одразувајќи ги пониските цени на растителните масла и житарките, соопшти во четвртокот агенцијата за храна на ООН, предупредувајќи дека пандемијата ги намалила приходите на земјоделците и дека на 47 земји ќе им биде потребна помош од храна.
ФАО индексот на цени на основните прехранбени производи падна за 2,5 проценти во јуни од просекот од 124,6 поени во јуни, но сепак е за една третина повисок отколку во истиот месец минатата година.
Цените на растителното масло најмногу паднаа минатиот месец, за 10 проценти во споредба со мај, а ФАО посочува на пониски цени на палминото, соја и сончогледовото масло.
Паднаа и цените на житните култури, за поскромни 2,6 проценти во споредба со мај, што е одраз на пад од 5% на цените на пченката како резултат на зголемената понуда во Аргентина.
Цените на пченицата се „лизнаа“ за 0,8 проценти, водено од поволните проценки на приносот кај клучните производители кои го надминуваат очекуваното негативно влијание на сушата врз приносите во Северна Америка.
Млекото и млечните производи паднаа за еден процент, пресмета ФАО, со нагло опаѓање на цените на путерот поради нагло опаѓање на побарувачката за увоз и мало зголемување на залихите, особено во Европа.
Само месото и шеќерот поскапеа, за 2,1 и 0,9 проценти, во споредба со мај.
Во посебен извештај за понудата и побарувачката на пазарите на житни култури, ФАО малку ја намали својата прогноза за овогодинешното производство на житни култури, на 2,817 милијарди тони, што сепак ќе постави нов рекорд.
Прогнозата за производство на житни култури што се користат во исхраната на луѓето и животните е малку намалена, на 1,512 милијарди тони, како резултат на пониските проценки на производството на пченка во Бразил по продолжената суша.
Прогнозата за производство на пченица, исто така, беше малку намалена, на 784,7 милиони тони, како резултат на сушата на Блискиот исток. Новата проценка продолжува да покажува рекордно производство и бележи пораст од 1,2 проценти во споредба со 2020 година.
ФАО ја намали и прогнозата за потрошувачката на житни култури во сезоната 2021/2022 на 2,81 милијарди тони, како резултат на неочекувано слабата потрошувачка на пченка во Кина за производство на добиточна храна.
Залихите на житни култури во светот треба да бидат поголеми на крајот на сезоната во 2022 година отколку на почетокот, за прв пат од сезоната 2017/2018 година, за 2,4 проценти, како резултат на очекуваниот раст на резервите на пченка во Кина.
Прогнозата за глобалната трговија со жито во новата сезона е малку зголемена, на рекордни 472 милиони тони, пред се поради очекуваната зголемена кинеска набавка на пченка.
Пандемијата „Ковид-19“ ги влоши проблемите во некои земји и го отежна пристапот до храна, пред се преку намалените приходи на земјоделците, предупредува ФАО во посебен извештај.
Тој проценува дека на 45 земји, вклучително и 34 во Африка, девет во Азија и две во Латинска Америка и Карибите, ќе им биде потребна надворешна помош поради тежок пристап до храна поврзана со вооружен конфликт и климатски шокови.
Во група од 47 земји со ниски примања кои не успеваат да произведат доволно храна за да го снабдат населението, вкупното производство на жито ќе се намали за 2,1 процент оваа година, на 190 милиони тони, соопшти ФАО, истакнувајќи дека Авганистан и Сирија ќе забележат најголем пад.