ТВ 21 излезе со реакција на списокот, кој што го објави Владата на С.Македонија за компаниите кои добиле државна помош поради Ковид-19, но парите не ги исплатиле на своите работници.
На првиот список кој беше објавен, а потоа ажуриран и поправен, се најде и името на ТВ21. Од телевизијата тврдат, дека сите плати на секој вработен се исплатени и покрај тешкотиите со кои се соочиле во функционирањето поради Ковид 19, за што имаат и докази.
„Тоа можат да го посведочат, се разбира банкарските трансакции, но и самите вработени. ТВ21 најодговорно тврди дека платата за месец април 2020 е исплатена во месец, мај, потоа платата за месец мај 2020 е исплатена во јуни, а платата за месец јуни е исплатена во месец јули. Воедно започна и предвремена исплата и за платата за месец јули. За ова секако се свесни и го знаат сите вработени, бидејќи платите ги добиле на своите трансакциски сметки. Единствено ТВ21 доцнеше со исплатата на здравственото и пензиското осигурување, но и тие обврски во изминатите денови се реализирани. Но, сепак уште еднаш потенцираме дека платите на сите вработени, без кратења и без намалувања се исплатени. ТВ21 брои 90 вработени, а годишно кон државата исплаќа 500 илјади евра давачки“, стои во реакцијата на телевизијата.