Во обид да го намали бројот на сообраќајни несреќи, владата на Велика Британија наскоро планира да им забрани на младите возачи да носат пријатели во своите автомобили. Како дел од предложените ограничувања, новите возачи – помлади од 25 години нема да можат да возат млади патници во автомобилот – една година откако ќе го положат нивниот возачки испит.
Според предлогот на министерот за транспорт Ричард Холден, конечната одлука за новиот закон ќе биде донесена на 16 мај, пренесува „Јутарњи“.
Според британските медиуми, секој петти возач има сообраќајна несреќа во рок од една година откако ќе го положи тестот. Исто така, новите возачи кои превезуваат патници на слична возраст имаат четири пати поголема веројатност да загинат во сообраќајна несреќа.
Младите возачи сочинуваат само шест отсто од сите возачи на патиштата во Велика Британија, но според статистичките податоци, тие учествуваат во повеќе од 20 отсто од фатални и сериозни несреќи.
Земјите како Ирска, Австралија, Нов Зеланд, Шведска и некои американски држави, исто така, воведоа слични програми за млади возачи кои неодамна го положија својот возачки испит.